تاند- امریکايي سیاستواله او د ولسمشرۍ پخوانۍ کاندیده هیلري کلنټن له نن څخه ۷۶ کاله پخوا د ۱۹۴۷ د اکتوبر په ۲۶ مه د الینایس (Illinois) په شیکاګو ښار کې زېږېدلې ده.
مېرمن کلنټن، چې د دیموکرات ګوند غړې ده، له لسیزو راهیسې د دغه هېواد په سیاست کې ښکېله ده.
دې د امریکا د متحدو ایالتونو په بېلابېلو سیاسي مقامونو کې کار کړی- لومړۍ مېرمن، سناتوره، د بهرنیو چاور وزیره، او د ولسمشرۍ داسې کاندیده چې تر خپل سیال یې ډیرې ولسي رایې وګټلې.
د اغلې کلنټن خاوند بېل کلنټن (له ۱۹۹۳ تر ۲۰۰۱) دوه دورې د امریکا ولسمشري کړې. بیل او هیلیري کلنټن یوه لور لري چې چلسي نومېږي.
دا د شیکاګو په لمنه کې په ( Park Ridge) کې لویه شوې ده، پلار یې د نساجي کاروبار درلود. او له دې کبله چې اقتصادي وضعیت یې ډیر ښه و، خپلې لور ته یې د تعلیم ښه اسانتیاوې برابرې کړې وې.
د دې اصلي نوم هیلیري ډایان راډهم دی او په ۱۹۷۳ کې د ییل پوهنتون د حقوقو له پوهنځي فارغه شوې ده. کله چې محصله وه ټولنیز فعالیت یې کاوه.
هیلیري په ۱۹۷۵ کال کې له بیل کلنټن سره واده وکړ.
وروسته له دې چې بېل کلنټن په ۱۹۷۸ کال کې د ارکانزاس ایالت والي شو هیلیري له سیاسي پلوه فعاله شوه.
په ۱۹۹۸ کې د سپینې ماڼۍ له یوې کارکوونکې مونیکا لوینسکي سره د ښاغلي کلنټن د جنسي اړیکو له امله میرمن کلنټن ته د خبري رسنیو پام لا زیات واوښت. خو مېرمن کلنټن د خپل مېړه منتقدین وغندل.
دې په ۱۹۹۸ کې په یوه مرکه کې وویل د لوینسکي قضیه چې د ولسمشر د استیضاح سبب شوې وه “د ښي اړخو له یوې پراخې دسیسې” څخه الهام اخیستی ؤ.
کله چې د بهرنیو چارو وزیره وه د کار د څلور کلنې دورې په ترڅ کې مېرمن کلنټن ۱۱۲ هیوادونو ته سفرونه وکړل چې دا د بهرنیو چارو د هر پخواني وزیر تر سفرونو ډېر دي.
هیلري کلنټن په ۲۰۰۳ کال پرعراق یرغل ته رایه ورکړه خو د جګړې له اړوندو چارو او د هغې له دفاع یې ځان لېرې وساته، او بلکې د امریکا د متحدو ایالتونو د عسکرو د اېستلو غوښتنه یې وکړه. مېرمن کلنټن په ۲۰۰۶ کال کې په آسانۍ سره د سناتورۍ څوکۍ بیا وګټله.
د دونالډ ټرمپ په وړاندې دوو مسلو د هیلبري کلنټن دریځ یو څه کمزوری او له پوښتنو سره مخامخ کړ. یو د دې روغتیا او بل د دې ایمیلونو.
د کمپاین پر مهال له خاله لوېدو یا بې سده کېدو د هېلري کلنټن روغتیا تر پوښتنو لاندې راوسته. همدا لامل شو چې دواړه نوماندان د خپلې روغتیا په اړه له خلکو سره د معلوماتو شریکولو ته اړ وځي.
د برېښنالیکونو پرسر ناندریو او د یوه قانوني نامعلوم حالت له امله د مېرمن کلنټن د لومړي پړاو او د ولسمشرۍ ټاکنیز کمپاینونه زیانمن شول، خو نظرپوښتنو بیا هم وښوده چې اغلې کلنټن بیا هم تر خپل جمهوریپال سیال ډونالډ ټرمپ ډېر پلویان لري.
د مېرمن کلنټن ژوند ليکونکي اکثره دې ته دا صفتونه کاروي: خواري کښه، پر خپل دريځ ټينګه، انډول رامنځته کوونکې، شنانده، معتدله، محافظه کاره، د مېتود له مخي کار کوونکې او ځيني وخت مغروره.