تاند:(شنبه ،د ميزان ۳۰مه) د طالبانو د حاکمې ادارې وياند ذبيح الله مجاهد په کابل کې د داعشيانو پر يوه مرکز د پرون ورځې او تېرې شپې د جګړې جزییات خپاره کړل.
نوموړي ویلي،چې تيره ورځ او شپه د داعشیانو د يوې مهمې شبکې په ضد د کابل په ختيځ کې د دوی د ځانګړو قطعاتو له لوري عمليات ترسره شوي.
د مجاهد په وينا،لومړی د داعشیانو دوه مهم کسان ونيول شول، وروسته د کابل ښار اتمې حوزې په مربوطاتو کې د داعشیانو يو پټنځای کشف او ماښام مهال عمليات پرې پيل شول.
طالب وياند زياتوي، چې د دغو عملياتو په نتیجه کې د داعشيانو شپږ تنه ووژل شول او له دوی څخه کلاشينکوفونه، لاسي بمونه، منفجره مواد او يو کرولا موټر تر لاسه شو.
مجاهد زياتوي:«په دې عملياتو کې وژل شوي داعشیان ټول هغه مجرمان وو چې د کابل د وزير اکبرخان مسجدد دشت برچي سيمه کې د کاج په ښونيز مرکز او د نورو ځينو ملکي سیمو په بريدونو کې یې لاس درلود.»
ذبيح الله مجاهد په دې عملياتو کې د يوه طالب عسکر د وژلو او بل د ټپي کیدو خبر هم ورکړی.
ځايي خلکو بیا ویلي، چې داعش ډلې هم د طالبانو پر وړاندې تر ناوخته پورې سخته جګړه او مقاومت کړی او ممکن طالبانو ته هم ډېر ځاني زیان اوښتی وي.
دا په داسې حال کې ده، چې طالبان بيا-بیا د داعش ډلې د نابودۍ اعلان کوي، خو وروسته د يادې ډلې د نورو بریدونو او د ځپلو لپاره یې د عملياتو خبر ورکول کېږي.