تاند:(شنبه ،د ميزان ۳۰مه) د افغانستان لپاره د امریکا ځانګړي استازی توماس وېسټ وايي،چې ژر به نوې چاپ شوې افغانۍ( بانک نوټونه) کابل ته ورسیږي.
هغه په یوه مجازي ناسته کې ویلي، چې د دغو پيسو د چاپ اجازه امريکا متحده ايالاتو ورکړې ده.
هغه له طالبانو سره د یوې بلې بانکي معاملې خبر هم ورکړی، خو د دواړو نور جزییات یې نه دي روښانه کړي.
د امریکايي استازي په خبره،چې د دواړو بانکي معاملو لګښتونه د افغانستان د مرکزي بانک لخوا تادیه شول.
ټام ویسټ وویل چې ډیر ژر به کابل ته د افغانیو نوي بانکنوټونه را ورسیږي.
په ورته مهال د افغانستان بانک پخواني سرپرست واحد نوشېر هم ویلي چې ډېر ژر به نوي چاپ شوي د افغانۍ بانکنوټونه بازار ته راووځي.
معلومه نه ده، چې ياد شوي بانک نوټونه څومره او د چا په امضا چاپيږي.
يوې باوري سرچينې تاند ته وويل، چې د طالبانو ادارې ته د نويو بانک نوټونو د چاپ اجازه نه ده ورکړل شوې، بلکې د جمهوري نظام پر مهال د چاپیدونکو افغانیو د نېمګړي کار دوام ته اجازه ورکړل شوې ده.
ګومان کېږي، چې پر دغو بانک نوټونو به د افغانستان بانک د يوه پخواني مشر او په ډېر احتمال د پخواني سرپرست وحید نوشېر لاسليک موجود وي.