تاند:(جمعه ،د ميزان ۲۹مه) د افغانستان يو مشهور سیاسي او پوځي کارپوه جنرال غرزی خواخوږی د ور پېښې ناروغۍ له امله په جلا وطنۍ کې ومړ.
خواخوږی د کندهار ولايت اوسیدنکی، د افغان بلوڅانو د سراسري شورا مرستيال او دغه راز د ملي امنیت پخوانی جنرال او د کابل ښاروالۍ مرستيال پاتې شوی و.
ویل کیږي، چې نوموړی له هغو پخوانيو خلقيانو څخه و، چې د طالبانو د تېرې واکمنۍ پر مهال دوی سره ملګری شوی او وروسته د کودتا په تور بندي شوی و.
د نوموړي ځينو مخالفانو هغه د پاکستاني استخباراتو په ملتیا د افغانستان د پخواني ولسمشر ډاکټر نجيب الله په وژلو کې په لاس لرلو هم تورن کړی و، خو نوموړي دا ادعاوې بې بنسټه بللې وې.
غرزی خواخوږی د حامد کرزي د واکمنۍ پر مهال د نوموړي د دفتر رییس عبدالکریم خرم له نیږدې کسانو او د امریکا د تګلارو له منتقدینو ګڼل کېده.
هغه سربېره پر دې لیکوال او د خواخوږي کولتوري ټولنې موسس و او د دغې ټولنې له ادرسه یې خپل او د نورو لیکوالو کتابونه خپاره کړي وو.
د غرزي خواخوږي پلار محمد ابراهيم خواخوږی هم فرهنګي او سياسي څېره وه، چې د خپل وخت د مشهور ملي – مترقي خوځښت( وېښ زلميان) او وروسته د صدراعظم هاشم ميوندوال د ملي مساوات ګوند له مخکښانو و.