تاند- د افغانستان توپوهونکی رحمان الله ګوربز، چې د چهارشنبې په ورځ د پاکستان پر وړاندې په تمریني لوبه کې ژوبل شوی و، پر خپله ټوېټر پاڼه ليکلي، چې ښه دی او د راتلونکو لوبو لپاره چمتو دی.
وړاندې د افغانستان کریکټ بورډ هم د نوموړي د روغتیا ډاډ ورکړی و او حالت يې د اندېښنې وړ نه و بللی.
ګوربز چې د افغانستان د لوبډلې له اوپینرانو څخه دی، پښه یې د شاهین افریدي په توپ ژوبله شوې وه.
ټاکل شوې ده چې د شنبې په ورځ د افغانستان لوبډله د ۲۰۲۲ د شل اوره نړیوال جام په لومړۍ سیالۍ کې د انګلیستان له پیاوړې لوبډلې سره مخامخ شي.