تاند:(دوشنبه ،د ميزان ۲۵مه) د پاکستان تر کنټرول لاندې پښتونخوا کې د پارلمان په پرونيو ضمني ټاکنو کې د عمران خان په مشرۍ د پاکستان د تحريک انصاف ګوند بریالیتوب او د نيشنل عوامي ګوند ماتې ته خلکو په ټولنیزو رسنیو کې پراخ غبرګونونه ښودلي دي.
د پرونيو ټاکنو د پايلو له مخې، د عمران خان نوماندان توانيدلي چې په چارسده کې د نيشنل عوامي ګوند ايالتي مشر او د باچا خان کړوسي ایمل ولي خان او په پېښور کې د دغه ګوند مطرح مشر غلام احمد خان بلور ته په خپلو سیمو کې ماتې ورکړې.
پښتنو ملتپالو د ټاکنو دغه پايلې دردونکې ګڼلي او ویلي،چې د نيشنل عوامي ګوند میراثي او کورني سياست پښتانه بدو ورځو سره مخامخ کړي دي.
د دوی په وينا، ياد شوی ګوند د ولي خان له مشرۍ وروسته او په خاص ډول په تېرو شاوخوا لسو کلونو کې له خپلو اصلي اهدافو منحرف شوی، تر دې چې د چارسدې خلک هم ځان سره نه شي ساتلی.
يو شمېر پښتنو ملتپالو له ايمل ولي خان او ګوندي ملګرو يې غوښتي، چې په نړيواله کچه د پښتنو د رهبرۍ له نوې او د وخت په ضرورتونو برابرې بڼې سره چې منظور پښتین رامنځته کړې، همغږي شي او د خپلې پاشلتيا او نورو لويدنو مخه ونيسي.
د دوی په باور، منظور پښتین هسې هم قدرت نه غواړي او د قام ويښتيا او ژغورل يې هدف دي او که نور ملتپاله ډلې ورسره يو لاس شيږ دوی ته به قدرت او منظور پښتین ته د پښتنو د يووالي او قوت هدف په لاس ورغلی وي.
نيشنل عوامي ګوند د خپلو نوو ماتو په اړه څه نه دي ويلي.
پخوا د پښتنو فدرالي حکومت هم د ټاکنو په پايله کې د نيشنل عوامي ګوند له لوري رهبري کيده، خو په وروستيو کلونو کې مذهبي ډلو او اوس د عمران خان ګوند ترې دغه ټاکنې ګټلي دي.