تاند:(دوشنبه ،د ميزان ۲۵مه) په داسې حال کې، چې د طالبانو پر وړاندې د پخوانيو سياستوالو او جنګي څېرو مخالفتونه هم دوام لري او ځینې یې له طالبانو ځهع د دوی شخصي امتیاز غوښتنه بولي، په ژجینوا کې يو شمېر پخوانیو چارواکو، سياستوالو او سياسي او مدني فعالانو د افغانستان په راتلونکي کې د دیموکراتیکو بنسټونو د ونډې په اړه غونډه کړې ده.
دوی په یوه اعلامیه کې ټینګار کړی،چې يوازې ټول پوښتنه او ټاکنې د افغانستان د مشروع دولت د رامنځته کیدو اساس جوړولی شي.
یاده غونډه د ژنیو د یوه څېړنیز مرکز په بلنه جوړه شوې وه،چې پکې د بشري حقونو د سيستماتيک نقض او له اساسي حقونو او آزاديو څخه د افغانانو، په خاص ډول د ښځو د محروميت په اړه يادونه شوې.
د طالبانو د ټولو سياسي، جنګي او مدني مخالفانو ترمنځ په تر ټولو مشترکو نقطو کې یوه مهمه هغه د ټاکنو له لارې د ملت په برخليک ټاکلو ټینګار دی، چې د شنونکو په باور دا مشترکه نقطه به ټول طالب ضد قوتونه په یوه لوی ایتلاف کې راټولیدو ته وهڅوي.
څو ورځې مخکې د افغانستان د سولې او عدالت ملي خوځښت په نوم د حنیف اتمر او معصوم ستانکزي په محوریت یو سیاسي جریان له هېواده بهر خپل موجوديت اعلان کړ.
د دغه حرکت اساسي غوښتنه هم دا وه چې له طالبانو سره باید سیاسي مذاکرات بیرته پیل او د يوه مشروع او منتخب دولت د رامنځته کیدو زمینه برابره شي.
په ورته وخت کې، څارونکي باور لري چې د طالبانو د حاکمې ادارې پر وړاندې له هېواده د باندې د مېشتو سياستوالو وروستيو تحرکاتو په افغانستان کې د طالبانو پر ادارې فشارونه زیات کړي او د نسبي نرمښت څرکونه پکې لیدل شوي.
د شنونکو په باور که طالبان هر څومره له ملت، سياسي ډلو او نړيوالې ټولنې سره په نرمښت او تعامل کې ځنډ وکړي، هغومره به د خپل دوام چانس کمرنګه او پر ضد به ېې وسله وال حرکتونه پياوړي شي.