تاند(سې شنبه، د میزان ۱۲مه) بلوڅ فعالان وايي، د ایران په زاهدان ښار کې پر لمونځ کوونکو د ایران د امنیتي ځواکونو د ډزو له کبله د وژل شویو کسانو شمېر ۸۰ تنو ته رسیدلی دی.
د دوی په وینا په وژل شویو کې دوه ماشومان، چې یو ۱۲ کلن او بل ۱۴ کلن وو، شامل دي.
په داسې حال کې چې د ایران په بیلابیلو ښارونو کې د حکومت پر ضد اعتراضونه دوام لري، د جمعې په ورځ د ایران امنیتي ځواکونو د سیستان او بلوچستان ولایت په مرکز په زاهدان کې د سُنیانو پر جومات پر لمونځ کوونکو له یو مخې ډزې وکړې.
ایراني چارواکو د ۱۹ تنو وژل کېدا تایید کړې وه خو شاهدانو د مرګ ژوبلو شمېر زیات ښوده.
د زاهدان بلوڅانو د ایران د پولیسو د یوه قوماندان له لوري په چاه بهار کې پر یوې بلوڅې نجلۍ د جنسي تیري په خاطر تر لمانځه مخکې په زاهدان کې اعتراض وکړ او د همدې اعتراض له کبله پولیس جومات ته وردننه شول.
د زاهدان د سنیانو د جمعې امام مولوي عبدالحمید، چې حکومت پلوی دی او له حکومته معاش اخلي، ویلي و چې لسګونو امنیتي ځواکونو، چې ځینو یې شخصي جامې اغوستې وې، پر لمونځ کوونکو ډزې وکړې.
ایراني رسنیو د سیستان او بلوچستان د والي په قول د ۱۹ تنو وژل کېدا او د ۲۰ تنو ټپي کېدا تایید کړې ده.