واوري دي اوري زموږ پر بامونو
زموږ به نغري وي تش له اورونو
امن راغلی ډوډۍ دي نه وي
کچکول به یوسو تر خیراتونو
×××××××××
خلکو اسلام دی درته راغلی
مُلا پاچا دی طالب ښاغلی
لا« څشي غواړی» له واکمنانو
هر کورته امن ور رسېدلی
×××××××××
خلکو خبرسی له اعلانونو
دښمن راغلی د کتابونو
علم شیطان دی خلک تېرباسي
ورونه دي بند وي د مکتبونو
×××××××××
اعلان یې کړی پر ټوله ښار دی
مفتي غوسه دی مُلا په قار دی
محتسب ګرځي دُره په لاس کي
ښځو پټېږی د مرګي وار دی
×××××××××
هغه له لوږي په زړو نتلي
په ژوند یې ښځي نه وې لیدلي
پر دې دنیا یې حوري نصیب سوې
اوس دي بېغمه ګرځي ښاغلي
×××××××××××
څوک چي له علم سره دښمن دی
غلیم د خاوري او د وطن دی
چي په تیاره کي عدالت غواړي
هم د کور غل دی هم دروغجن دی
××××××××××
قاصد راغلی وايي یارانو
لښکر راغلی د طالبانو
ښځي دي پټي په کور کي اوسي
شیطان قوي دی د ملایانو
××××××××××
چي کیسې اورم د هیوادونو
پر مخ د مځکي د جنتونو
زموږ دي ژوندون وي د مرګ په خوله کي
څه له قحطیو څه سېلابونو.