تاند- له نن څخه ۱۷ کاله پخوا د نوومبر په ۵ مه د عراق سترې محکمې پخوانی ولسمشر صدام حسین د «بشریت پر ضد د جنایت» په جرم په اعدام محکوم کړ.
د سترې محکمې وروستۍ غونډه په دې ورځ د سختو امنیتي تدابیرو په منځ کې په بغداد کې دایره شوه او د قاضي رووف عبدالرحمان په مشرۍ منصفه پلاوي پرېکړه وکړه چې صدام دې په دار وځړول شي.
پر صدام په ۱۹۸۲ کال کې د بغداد د شمال په ۶۰ کیلومتري کې په دُجیل ښار کې په ډله ییز ډول د ۱۴۸ شیعه ګانو د وژلو تور لګول شوی و.
محکمې په دې جرم نه یوازې صدام حسین بلکې د ده ناسکه ورور برزان ابراهیم تکریتي او د صدام حسین د حکومت په مهال د انقلابي محکمې قاضي عامد البندر هم په اعدام محکوم کړل.
په ۲۰۰۳ م کال امریکا په دې پلمه چې صدام حسین د ډله ییزې وژنې وسلې لري او نړۍ ته خطر پېښوي، پر عراق یرغل وکړ، په ۲۰۰۳ کې د صدام حسین رژیم وپرزول شو.
صدام حسین، چې د امریکا له حملې وروسته پټ و، د ۲۰۰۳ د دسمبر په ۱۳مه په یوه کور کې ونیول شو.
د ۲۰۰۶ کال د دسمبر په دېرشمه، چې د لوی اختر ورځ وه، په بغداد کې په دار وځړول شو.
د عراق د ملي امنيت سلاکار موافق الروبي چې د اعدام پر وخت حاضر و، وويل صدام حسين تر سپيده چاود مهال وړاندې زندۍ شو او دغه چاره د ويډيويي فلم له لارې ثبت شوه.
د ده په وینا صدام حسين په کراره په زولنو کې دار ته ورسول شو، له دۀ سره قران شريف و.
صدام حسين د اعدام پر وخت مقاومت ونه کړ خو د تورې کڅوړې له په سرولو يې انکار وکړ.
صدام حسین د پوځي استخباراتو په يوې پخوانۍ کې اعدام شو.
د صدام حسين د اعدام د خبر تر خپريدا وروسته په يوۀ خپارۀ کړي بيان کې د امریکا د هماغه مهال ولسمشر، جورج ډبلیو بوش وويل، دا د عراق لپاره د يوې مهمې لاسته راوړنې په مانا ده. دۀ وويل د خپلو خلکو پر ضد د خورا بدو جرمونو په خاطر صدام حسين عادلانه محاکمه وليده.
خو ښاغلي بوش په عین حال کې وویل، د صدام حسين په اعدامولو به په عراق کې تاوتريخوالى ختم نه شي. د صدام حسین له اعدامه وروسته په کلونو جګړو په خورا خونړي ډول دوام وکړ.
د بریتانيا د بهرنيو چارو وزير مارگريټ بکيټ د صدام حسین پر اعدام په غبرګون کې وويل له صدام حسينه حساب وغوښتل شو.
صدام حسین د ۱۹۳۷ کال د اپریل په ۲۷ د تکریت په العوجه کلې کې په یوه شپنه کورنۍ کې زېږېدلی، له ۱۹۷۹ تر ۲۰۰۳ پورې د عراق ولسمشر و.
دی د بعث ګوند یو مهم غړی و او د دغه ګوند له لوري د ۱۹۶۸ کال په کودتا کې یې کلیدي رول درلود.
بعث ګوند پر پان عربیزم او سوسیالیزم باور درلود.
صدام حسین د خپل حکومت په مهال له ایران سره اته کاله جګړه وکړه، د ایران د خاورې ځینې برخې یې ونیولې خو وروسته له دې چې له ایران سره یې اوربند وکړ، پر کویت یې وبلوسل، دا کوچنی عربي هیواد یې، چې د ایران خلاف د جنګ په مهال یې له بغداد سره ډېرې مالي مرستې کړې وې، په څو ساعتونو کې ونیوه.