تاند (سه شنبه د لړم ـ عقرب ۱۳مه) د طالبانو عامې روغتیا وزارت د خپلو سرچېنو له قوله خبر ورکړی، چې د وړمې شپې زلزله کې ۹۵۶ تنه ژوبل او ۲۷ تنه مړه شوي دي.
د یاد وزارت ویاند شرافت زمان په خپله فېسبوکپاڼه لیکلي، په روغتونو کې ټپیانو ته لازم چمتووالی نیول شوی او درملنه یې دوام لري.
نوموړي دغه راز زیاته کړې، چې د زیانمنو له ډلې یوازې سمنګان کې ۴۱۸ تنه ژوبل او ۱۳ تنه مړه شوي او پاتې نور بیا په بلخ، بغلان، کندز، سرپل او جوزجان ولایتونو کې مړه او ژوبل شوي دي.
د یادونې ده، چې وړمه شپه شاوخوا یوه بجه د هېواد شمالي ولایتونو کې د ۶ اعشاریه ۳ ریښتر په کچې زلزلې ګڼو خلکو ته درانده زیانونه واړول.
لاهم ارقام وروستۍ نه دي او د ژغورنې عملیات دوام لري.