تاند ( شنبه د لړم ـ عقرب ۸مه)د طالبانو د کرنې، اوبو لګولو او مالدارۍ وزارت وایي، د دوی د هڅو له امله سږ کال د وچې مېوې کیفیت او زیاتو حاصلاتو ته په کتو ټاکل شوې د صادراتو کچه د تېر کال په پرتله زیاته شي.
یاد وزارت لیکلي، سږ کال به له کندهاره د دغو محصولاتو صادرات ۵ زره مټریک ټنو ته ورسیږي.
د طالبانو د سوداګرۍ او پانګونې خونې مسؤلانو هېواد کې د وچې مېوې کیفیت او حاصلاتو زیاتېدو لامل، معیاري وچول او د بازار موندنې زمینې برابرول یاد کړي.
یاد وزارت لیکلي، تېر کال د وچو مېوو صادراتو کچه ۴ اعشاریه ۵ زره مټریک ټنه وه، خو سږ کال د کورنیو تولیداتو په زیاتوالي او د کرنې وزارت د تخنیکي ملاتړ له برکته دا شمېر پینځه زره مټریک ټنو ته لوړیږي.
د یادونې وړ ده چې، د افغانستان ۱۵ ډوله وچې مېوې له بلخ، تخار، هرات، غزني، فاریاب، جوزجان او کندهار ولایتونو څخه راټولېږي او د کندهار شوراندام کې بستهبندي کېږي او له هغه ځایه هندوستان، پاکستان او یو شمېر اروپايي هېوادونو ته صادرېږي.