تاند:(شنبه ،د ميزان ۹مه) په کابل کې نن لسګونه ښځینه زده کوونکو د کاج په نوم کانکور چمتووالي پر يوه مرکز د پروني ځانمرګي برید خلاف لاريون وکړ.
دغه لاریون د کابل په لویدیځ کې پيل شوی و ،خو طالبانو یې ګډونوال او د لاریون خبري پوښښ ته ورغلي خبریالان ډبولي.
د لاریون یو شمېر ګډونوالو ويلي،چې طالبانو دوی او خبریالان د ټوپک په میل او برقي ډندو په وسیله وهلي او لاریون ېې پاشلی دی.
طالبانو په دې اړه څه نه دي ويلي.
اوړمه ورځ د ايران سفارت مخې ته هم پر ښځینه لاريون کوونکو طالبانو هوایي ډزې وکړې او لاریون ېې سره وپاشه.
په پروني برید کې د طالبانو د کورنیو چارو وزارت د ۱۹تنو د وژل کیدو او ۲۷نورو د ټپي کیدو خبر ورکړ، خو سي این این تلویزیون د روغتيايي سرچينو په حواله ویلي چې د وژل شويو کسانو شمېر ۲۳ او د ټپيانو ۳۶تنه دی.
د طالبانو د ادارې عمومي ویاند ذبیح الله مجاهد دا برید غندلی او د عاملینو د نیولو او مجازات ژمنه یې کړې ده.
د ټولنيزو رسنيو ځینو فعالانو بیا ويلي،چې په غندنو نه څه کیدای شي او نه افغانان او حاکمه اداره ېې د داسې پېښو پر وړاندې له غندنو پرته څه کولای شي.
د دغه برید مسوولیت چا پر غاړه نه دی اخیستی،خو ګومان کېږي چې داعش ډله به ېې پر غاړه واخلي.
د بې واکه شوي ولسمشر محمد اشرف غني د ملي امنیت سلاکار ډاکټر حمد الله محب وايي دا کار د یوې منطقوي دسیسې برخه ده چې افغانستان کې مذهبي او قومي جنګ ته لاره هواروي.
د هغه په وينا، پخوا هم دا بریدونه د یو تعداد طالبانو په همکارۍ کېدل او اوس یې چې دوی مخنیوی نکوي، په ډاګه کوي چې دوی لا هم د روانې دسیسې برخه دي.
په ورته وخت کې د هزاره ګانو د یوه ګوند مشر حاجي محقق ویلي،چې دغه برید نه وروسته به هزاره ګان هم د طالبانو خلاف مقاومت پيل کړي،چې دی اجازه ورکوي او ممانعت نه ورته کوي.