تاند:( یکشنبه ،د ميزان درېيمه) د طالبانو د ریاستالوزرا اقتصادي مرستیال ملا عبدالغني برادر آخوند د ټاپي ګاز نللیکې شرکت له اجرایوي رئیس محمد مراد امانوف او د افغانستان لپاره د ترکمنستان له سفیر سره وکتل.
د طالبانو د خبرپاڼې له مخې، په دې کتنه کې دواړو لوریو د افغانستان او ترکمنستان ترمنځ د ټاپي پروژې د هوکړه شویو مواردو پر عملي کولو او د یادې پروژې د عملي چارو بهیر پر پیل هر اړخیزې خبرې کړې دي.
په لیدنه کې ملا برادر د افغانستان اوسنی وضعیت یو ښه فرصت بللی او زیاته کړه یې ده، چې د دوی اداره د ټاپي پروژې د پيل لپاره پوره چمتووالی لري او په دې برخه کې هر ډول همکارۍ ته تیار دي.
د ټاپي ګاز نللیکې شرکت اجرایوي رئیس ویلي، چې په نږدې راتلونکي کې به د دولتونو په کچه د ټاپي پروژې د رهبرۍ کمېټې غونډه په عشقآباد کې جوړه شي.
د یادونې وړ ده چې د ټاپي ګاز نللیکې پروژه ۱۸۰۰کیلومتره واټن لري چې له ترکمنستان څخه د افغانستان او پاکستان له لارې هند ته لېږدول کېږي.