تاند:( جمعه ،د ميزان اوله) د امریکا متحده ایالاتو د بهرنیو چارو وزیر انتوني بلینکن له افغانستان سره د خپل هېواد د ۳۲۷ميليونه امريکايي ډالرو نوې بشري مرسته اعلان کړه.
نوموړي په یوه اعلامیه کې وویل،چې دا مرسته به د نړيوالو بشر پاله ادارو په وسيله ووېشي.
د طالبانو حاکمې ادارې په دې اړه څه نه دي ويلي.
طالبانو له امریکا متحده ایالاتو څخه بیا-بيا غوښتي چې د افغانستان شاوخوا ۱۰ميليارده ډالره کنګل کړې بانکي زېرمه په واک کې ورکړي.
امريکايي چارواکي بیا وايي،چې يادې پيسې د افغانستان مشروع دولت ته سپاري او طالبانو ته ېې ځکه نه ورکوي،چې اداره يې ملي او نړيوال مشروعيت نه لري او دغو پيسو نه د ناسمې استفادې احتمال موجود دی.
امریکايي چارواکو له طالبانو سره د نه تعامل باوجود ویلي، چې افغانانو سره د بشري مرستو لپاره ولاړ دي او د ملګرو ملتونو له لارې د څلويښت ميليون ډالري بستو په برابرولو کې مهم رول لري.
د ملګرو ملتونو د ارقامو له مخې،د افغانستان شاوخوا ۲۵ميليونه خلک د فقر تر کرښې لاندې ژوند کوي او دغه وضعیت ورځ تر بلې خطرناک کيږي.