تاند:( جمعه ،د ميزان اوله) په نیویارک کې د ملګرو ملتونو د عمومِي اسمبلِۍ له کلنۍ غونډې څخه راپورونه وايي،چې افغانستان د ژور بشري او اقتصادي ناورين سره بیا هم سږ کال د ملګرو ملتونو د کلنۍ غونډې يو حاشیوي بحث دی.
د عمومي غونډې مطبوعاتي څارنې څرګندو،چې لږو ویناوالو د افغانستان د وضعيت په اړه خبرې کړي.
په دې ترڅ کې تر اوسه د قطر امیر د طالبانو او امریکا ترمنځ په دوحه کې د سولې د لاسليک شوي تړون د عملي کیدو غوښتنه کړې او خبرداری یې ورکړی،چې افغانستان ته نه پاملرنه به دغه هېواد د ترهګرو په مرکز بدل کړي.
د ترکیې ولسمشر رجب طیب اردوغان بیا له طالبانو غوښتي،چې د بشري حقونو د تامين په اړه خپلې ژمنې عملي کړي.
د فرانسې ولسمشر بيا په افغانستان کې د بشري ناورين موضوع یاده کړې او ورته د نړیوالې پاملرنې غوښتنه ېې کړې ده.
له دې وراخوا، په حاشیوي بحثونو کې د افغانستان په اړه د امریکا متحده ایالاتو په محوریت، هغه هم د افغانستان په اړه د دوو ځانګړو استازو په کچه ېې ځینو هېوادونو سره بحثونه او رسنیزې اعلامیې مطبوعاتي شوي.
د امریکا متحده ایالاتو، اروپايي ټولنې، فرانسې، المان، ايټاليا، ناروې او بریتانیا په یوه ګډه اعلامیه کې ټینګار کړی،چې په افغانستان کې د تلپاتې سولې او ثبات لپاره د یوه منتخب حکومت رامنځته کېدل اړین دي.
په دې اعلاميه کې خبرداری ورکړل شوی،چې د منتخب، ټول ګډونه او ځواب ويونکي حکومت له رامنځته کيدو پرته به افغانستان کې وسله والې شخړې خورا زیاتې شي.
امریکا متحده ایالاتو په ورته مهال، د ملګرو ملتونو د عمومي غونډې په حاشیه کې د قطر، ترکېې، پاکستان او ازبکستان په ملتیا یوه اعلامیه کې ویلي،چې طالبانو سره به د ټول ګډونه حکومت د جوړولو، د بشري حقونو د رعايت، د ښځو د حقونو او په خاص ډول د تړل شويو ښځينه ښوونځيو د پرانيستلو په شرط اړیکې عادي حالت ته راولي.
په کابل کې د طالبانو حاکمې ادارې د ملګرو ملتونو له عمومي غونډې او حاشیو څخه ېې مطرح شویو څرګندونو ته غبرګون نه دی ښودلی.
شنونکي، د ملګرو ملتونو له عمومي بحثونو څخه د افغان ناورین حاشېې ته کول افغانستان او نړیوالو ټولو ته په تاوان بولي او پر طالبانو نیوکه کوي، چې د سخت دریځو او نا معقوله سیاستونو او اقداماتو په وسيله یې د افغانستان ډېر فرصتونه ضايع کړي دي.