تاند:( جمعه ،د ميزان اوله) لومړني راپورونه وايي،چې د کابل ښار په دیپلوماتیکه سیمه وزير اکبرخان مېنه کې د درنې چاودنې غږ اوریدل شوی.
ویل کیږي،چې دغه چاودنه په وزير اکبرخان جومات کې رامنځته شوې، چېرته چې معمولا د جمعې ورځې د لمانځه لپاره یو شمېر مهم طالب چارواکي ورځي.
يو شمير سرچينو ويلي،چې دغه غږ په شهرنو سیمه کې هم اوریدل شوی.
د طالبانو امنيتي چارواکو او نورو سرچينو په دې اړه څه نه دي ويلي.
پرون ماښام د کابل په خيرخانې سیمه کې د طالبانو یوې پوستې ته څېرمه هم د درنې چاودنې خبر ورکړل شوی و.
په وروستيو ورځو کې له کابل څخه د ورته پېښو خبرونه زیات شوي.
پرون د امریکا متحده ایالاتو، اروپايي ټولنې، فرانسې، المان، ايټاليا، ناروې او بریتانیا په یوه ګډه اعلامیه کې چې د ملګرو ملتونو د کلنۍ غونډې په حاشیه کې خپره شوې، ټینګار شوی،چې په افغانستان کې د تلپاتې سولې او ثبات لپاره د یوه منتخب حکومت رامنځته کېدل اړین دي.
په دې اعلاميه کې خبرداری ورکړل شوی،چې د منتخب، ټول ګډونه او ځواب ويونکي حکومت له رامنځته کيدو پرته به افغانستان کې وسله والې شخړې خورا زیاتې شي.