تاند:( جمعه ،د ميزان اوله) په کابل کې د ايمرجنسي روغتون سرچينو ويلي،چې د وزير اکبرخان جومات مخې ته د نن ماسپښين له پېښې ۴ جسدونه او ۱۰ ټپیان ور وړل شوي.
د کابل لپاره د طالبانو د امنیه قومندانۍ ویاند خالد ځدراڼ ويلي،چې د پېښې قربانيان او ټپيان ټول ملکي وګړي دي.
طالبانو د پېښې د څرنګوالي په اړه څه نه دي ويلي.
د طالبانو د ادارې عمومي ویاند ذبیح الله مجاهد د جوماتونو او لمونځ کوونکو هدف ګرځول ستر او نه بښونکی جنایت ګڼلی.
د پېښې مسووليت چا پر غاړه نه دی اخیستی.
پرون ماښام د کابل په خيرخانې سیمه کې د طالبانو یوې پوستې ته څېرمه هم د درنې چاودنې خبر ورکړل شوی و.
په وروستيو ورځو کې له کابل څخه د ورته پېښو خبرونه زیات شوي.
پرون د امریکا متحده ایالاتو، اروپايي ټولنې، فرانسې، المان، ايټاليا، ناروې او بریتانیا په یوه ګډه اعلامیه کې چې د ملګرو ملتونو د کلنۍ غونډې په حاشیه کې خپره شوې، ټینګار شوی،چې په افغانستان کې د تلپاتې سولې او ثبات لپاره د یوه منتخب حکومت رامنځته کېدل اړین دي.
په دې اعلاميه کې خبرداری ورکړل شوی،چې د منتخب، ټول ګډونه او ځواب ويونکي حکومت له رامنځته کيدو پرته به افغانستان کې وسله والې شخړې خورا زیاتې شي.