تاند (پنجشنبه) وروسته له دې چې د روسیې ولسمشر ولادیمیر پوتین وویل، د اوکراین د جګړې لپاره د روسیې احتیاطي ځواکونه جګړې ته چمتو کوي، د نړۍ د نورو اسعارو په وړاندې د امریکايي ډالر ارزښت په شلو کلونو کې تر ټولو لوړ حد ته اوچت شو.
د هر امریکايي ډالر انډیکس یا شاحص، چې د یورو، جاپاني ین او د بریتانیا د پونډ په شان د نورو هیوادونو د پیسو د واحد په وړاندې د هغه ارزښت څرګندوي، پرون (چهارشنبې) له ۸۷ څخه ۱۱۰ ته لوړ شو.
دا له ۲۰۰۲ م کال را په دې خوا د امریکايي ډالر د شاخص تر ټولو لوړه کچه ګڼل کېږي.
پر دې سربېره چې امریکايي ډالر اوس په نړۍ کې تر ټولو خوندي او باوري پیسه ګڼل کېږي، د امریکا د مرکزي بانک سخته پولي پالیسي هم، چې تمه ده ژر به اعلان شي، د ډالر د ارزښت په لوړېدو کې رول لرلی دی.
د اقتصادي چارو نظرخاوندان باور لري چې د روسیې له لوري د سلګونه زره احتیاطي ځواک د چمتو کولو له کبله په اوکراین کې د جګړې د لا سختېدو په اړه اندېښنې پانګوال هڅوي چې د ډالر په شان لا خوندي اسعارو ته پناه یوسي.
پوتین د چهارشنبې په ورځ لوېدیځوال د روسیې د ویجاړولو لپاره په هڅه تورن کړل او ویې ویل چې د خپل هیواد د دفاع لپاره به له هر راز وسیلې څخه کار واخلي.
روسیه اتومي قدرت دی او ظاهراً د پوتین اشاره اتومي وسلې ته وه.
د ډالر د ارزښت له لوړېدو سره په بریتانیا کې د اقتصاد د ناوړه لرلید له کبله د دغه هیواد د پیسو یعني پونډ ارزښت د ډالر په وړاندې له ۱۹۷۵ څخه را په دې خوا تر ټولو ټیټ حد ته رسېدلی دی.
ټاکل شوې ده چې د بریتانیا مرکزي بانک نن (پنجشنبه) خپله نوې پولي پالیسي اعلان کړي او باور کېږي چې د انفلاسیون د زیاتېدونکي بهیر د ورو کولو لپاره بانکي سود لوړ کړي.