تاند:(يکشنبه،د سنبلې ديارلسمه) د طالبانو د رژيم د عدليې وزارت مرستيال شېخ عبدالکریم حیدر ویلي،چې د شریعت په اساس د يوه اساسي قانون د جوړولو پلان لري.
د ده په وينا،اساسي قانون تر ډېره کفري هيوادونه د خپلو قوانینو لپاره کاروي، ځکه دوی کوم بل قانون نه لري.
د نوموړي په خبره، د طالبانو رژيم قرآن، حنفي فقه او محمدي سنت په ټولو ادارو کې د قانون په توګه کاروي، خو له دې سره د داسې اساسي قانون د جوړولو پلان لري، چې ماخذ يې شریعت وي.
دغه طالب چارواکي د ښځينه مدافع وکیلانو لپاره اوسني شرایط برابر ونه ګڼل او په ټينګار يې وویل، چي هغوی او نورو ښځو ته به د شرایطو له برابرېدو سره دا حق ورکړي.
تر دې مخکې د طالبانو د ستري محکمې مسولینو ویلي وو، چي د قضا په برخه کې د ښځو د فعالیت اړتیا نشته.
د طالبانو د عدلیې وزارت مرستیال شېخ حیدر دا هم وویل، چې په افغانستان کې اوس د سیاسي ګوندونو فعالیت ته اړتیا نه ده، ځکه د ده په باور ګوندونه په هیواد کې د فکري، ژبنيزو، قومي او نورو ستونزو د راپورته کېدو لامل کیږي.
څه موده مخکې د طالبانو لوی مشر ملا هبت الله په يوه وينا کې د جمهوري نظام ټول قوانين لغوه او اعلان وکړ،چې نور به شرعي قوانين عملي کیږي.
د طالبانو د دفاع وزیر ملا یعقوب مجاهد بیا په یوه مرکه کې وويل،چې افغانستان اساسي قانون ته اړتيا لري.
زما په اند داسې برېښي چې طالبي ډلګۍ دا ځلې د تل لپاره د خپلې نابودۍ چاڼس لا پياوړی کړ او خپله يې خپلې پښې بيرته په تبر ووهلې.
د نړۍ ډېر اسلامي هېوادونه ان د دوی دويم کوربه هېواد قطر هم يو اساسي قانون لري چې د هماغې په رڼا او نورو استخباراتي معاملو په پايله کې يې ورته ځای ورکړی او لا پالي يې.