تاند:(يکشنبه،د سنبلې ديارلسمه)‏‏ د پاکستان تر ولکې لاندې د پښتونخوا په خیبر سیمه کې زرګونو پښتنو فعالانو نن د يوه لوی لاریون له ترسره کولو سره په مختلفو برخو کې د پاکستان د حکومت خلاف غږ پورته کړ.

دا لاریون،چې د پښتون ژغورنې غورځنګ،ملي جمهوري غورځنګ او نورو پښتنو ملتپالو ډلو په مشرۍ تر سره شو، د پاکستان پارلمان کې د وزيرستان د استازي علي وزير د‌ خوشې کیدو پر غوښتنې یې ټینګار وکړ.

ښاغلی وزیر له څو کلونو راهيسې له دې کبله پاکستان بندي کړی،چې په قبايلي سيمو کې ېې د پاکستان د پوځ له پښتون ضدو سياستونو او وژنو پرده پورته کړې وه.

پښتنو ملتپالو دغه راز د پښتنو سيمو کې د پاکستان د تحريک طالبان ډلې د بیا حاکمیدو د مرموزې لوبې مخالفت هم وکړ او په دې اړه ېې د پاکستان د پوځ د څو مخو سياستونو خبر ورکړ.

پښتنو ملتپالو وویل،چې د پاکستان پوځ په لر او بر کې د پښتنو د ځپلو او سره پاشلو اصلي دښمن دی او په افغانستان کې یې د طالبانو له واک ته رسولو وروسته اوس په بره پښتونخوا کې د خپلو استخباراتي سياستونو لپاره پر پښتنو سيمو د پاکستاني طالبانو د حاکمولو لوبه پیل کړې ده.

پاکستاني پوځ او حکومت په دې اړه غبرګون نه دی ښودلی.

پاکستان مخکې هم ډېر ځله په داسې تورونو تورن شوی،خو دغه هېواد ېې د ځواب ویلو پر ځای پښتانه فعالان زنداني کړي،وژلي او نادرکه کړي دي.