تاند:(شنبه،د سنبلې دولسمه) د هرات ښار په ګذرګاه جومات کې د جمعې ورځې د لمانځه پر مهال پرونی ځانمرګی برید،چې د طالبانو د سرسخت ملاتړي ملا مجیب الرحمان انصاري په ګډون د لسګونه تنو د مرګ ژوبلې سبب شو، په پراخه کچه غندل شوی.
دا برید،چې اصلي هدف ېې د ملا انصاري په نښه کیدل ښودل شوي، مسوولیت ېې داعش ډلې پر غاړه اخیستی.
طالبانو په دې برید کې د ملا انصاري، د هغه د ورور او امنيتي ساتونکو په ګډون د ۱۸ تنو د وژل کیدو او ۲۲نورو د ټپي کیدو خبر ورکړی،خو ځايي سرچينو ويلي چې د برید د وژل شويو کسانو شمېر شاوخوا ۴۰ او د ټپيانو هم له اعلان شویو ارقامو څخه زيات دی.
په افغانستان کې د ملګرو ملتونو د سرمنشي د استازي ځانګړي دفتر ياد شوی برید غندلی او د عبادت ځايونو د خوندیتوب غوښتنه ېې کړې ده.
پخواني ولسمشر حامد کرزي، د ملي مصالحې پخواني شورا رييس ډاکټر عبدالله او ګڼو نورو افغان سیاسي څېرو هم دا برید غندلی.
د ملا انصاري يو شمېر منتقدینو بیا ویلي،چې هغه د نورو د مرګ فتوا ورکوله او آخر خپله د افراطیت په بل کړي اور کې قرباني شو.
ملا انصاري څه موده مخکې د طالبانو په ملاتړ د ملایانو په یوه لویه غونډه کې د هغو کسانو د سر پرې کولو فتوا ورکړه،چې د طالبانو مخالفت کوي.