تاند( دوشنبه، د سنبلې اوومه) د طالبانو د کورنیو چارو وزارت چارواکي وايي،چې تېر کال ېې ۲۰۸ تنه د پيسو د قاچاق اړوند مختلفو جرمونو په تړاو نیولي.
د ياد شوي وزارت چارواکو پرون په یوه خبري غونډه کې وويل،چې د تېر کال په موده کې د دوی د سرحدي ځواکونو له لوري د ۳ میلیونه امریکایي ډالرو، ۲۰ زره پونډه، ۳۹ زره دینارو، ۲۹۰ زره درهمو، ۲۰ زره سعودي ریالو او ۶۴۰۰ یورو له قاچاق څخه مخنیوی شوی دی.
طالب چارواکو د پيسو د قاچاق مخنيوی د بهرنيو اسعارو پر وړاندې د افغانیو د ارزښت ساتلو لپاره مهم ګڼلي دي.
دا په داسې حال کې ده،چې اقتصادي شنونکي د اقتصادي مافیا له لوري لا هم د پيسو د قاچاق د دوام ادعا کوي او زياتوي،چې د بهرنيو اسعارو پر وړاندې د افغانیو د ارزښت ساتلو اصلي دليل افغانستان ته د نړيوالو د څلویښت میلوني ډالري بشري مرستو استول دي،چې هره اونۍ یې دغه هېواد ته را استوي.