تاند(چهارشنبه، د اسد ۲ مه) افغان کډوالو، چې له یو کال راهیسې له افغانستانه راایستل شوي او په متحده عربي اماراتو کې بې برخلیکه پراته دي، د دوشنبې او سې شنبې په ورځو مظاهره وکړه.
د رویټرز خبري اژانس د راپور له مخې، مظاهره چیانو په دې اعتراض درلود چې د دوی د لېږدولو پروسه خورا سوکه ده.
دوی، چې شمېر یې سلګونو کسانو ته رسېده، په لیکلو شعارونو کې د ازادۍ او امریکا یا کوم بل درېم هیواد ته د لېږېدو غوښتنه کوله.
رویټرز وايي چې په ترلاسه کړیو تصویرونو او ویدیوګانو کې ښځې، ماشومان او سړي لیدل کېږي چې د متحده عربي اماراتو په یوه کمپ کې په داسې حال کې اعتراض کوي چې د تودوښې درجه د سانتي ګراد مثبت ۳۸ ده.
پر یوه بینر (شعار) لیکل شوي:«یو کال بس دی.»
د متحده عربي اماراتو چارواکو او په دغه هیواد کې د امریکا سفارت د دې اعتراض په اړه له څه ویلو ډډه کړې ده.
د فبرورۍ په میاشت کې هم په دغه کمپ کې افغانانو اعتراض کړی و.
په متحده اماراتو کې سلګونو منتظرو افغانانو مظاهره وکړه