تاند( شنبه ، د اسد ۲۹ مه) یوه تاجکستاني چارواکي ويلي، چې د کاسا زر بريښنايي پروژې چارې په افغانستان کې د امنيتي ستونزو له امله درېدلي.
د تاجکستان د برېښنا پروژې د دفتر رییس فیض علي سمیعوف رویټرز اژانس ته ویلي، د دې پروژې کار، چې له افغانستان سره د اړیکو ښه کیدو او دغې پروژې په اړه د خبرو د پیل په هیله دي.
سرچینې پر امنيتي ستونزې سربېره د نړيوال بانک او نورو ډونرانو له لوري د دغې پروژې د تمويل نه دوام د يادې پروژې د چارو دريدو سبب ګڼلی.
د کاسا زر پروژې له مخې، قرغیزستان او تاجيکستان خپله اضافي بريښنا پاکستان او افغانستان ته لېږدوي.
رویټرز اژانس وایي،چې د يادې پروژې یو لوی تمویلونکی(نړیوال بانک) د طالبانو د واکمنۍ د نه مشروعیت او نړيوالې انزوا له کبله دغه پروژه سمدستي نه غواړي تمویل کړي.
کاسا زر پروژه له مرکزي اسیا څخه سویلي اسیا ته د برېښنا د لېږد ترټولو لویه پروژه ده، چې د کابو یو میلیارد او ۱۷ میلیون ډالر لګښت اټکل یې شوی دی.
امریکا متحده ایالات هم د ځينو نورو نړیوالو بنسټونو تر څنګ د يادې پروژې له تمویلونکو څخه و.
په کابل کې د طالبانو حاکمې ادارې په دې اړه څه نه دي ويلي.
طالبان او تاجيکستان ښې اړيکې نه لري، ځکه تاجیکستاني چارواکي ډېر ځله د طالبانو حاکمه اداره قومي او انحصاري بولي او طالبان دغه هېواد په خپلو چارو کې په لاس وهنې تورنوي.