تاند( يکشنبه ، د اسد ۲۳ مه) د پاکستان په پلازمېنه اسلام اباد کې له هېواده وتلو لسګونو افغان خبریالانو په افغانستان کې« د بیان ازادۍ د مرګ» د لومړي تلين په مناسبت ویر غونډه وکړه.
دغو خبریالانو په افغانستان کې د جمهوري نظام سقوط، د نورو ولسواکو ارزښتونو تر څنګ د بیان ازادۍ مړینه وګڼله او د افغان خبریالانو ننګونکي وضعیت ته ېې د نړيوالو د عاجلې پاملرنې غوښتنه وکړه.
دغو خبریالانو د افغانستان د وژل شوې بیان ازادۍ په ویر شمعې هم ولګولې او د بیان ازادي د ارزښت لپاره ېې د دوی له مبارزو د نړيوال ملاتړ ټینګار وکړ.
دا په داسې حال کې ده، چې پرون هم د طالبانو د منتقدو مېرمنو د یوه لاریون د خبري پوښښ پر مهال طالبانو څه باندې ۱۰ افغان او بهرني خبريالان بنديان کړي.
تر اوسه د دغو خبریالانو د برخلیک په اړه څه نه دي ويل شوي، خو ځينو خبریالانو د دوی د وهلو ټکولو اسناد خپاره کړي.
د بې پولې خبريالانو نړيوالې ټولنې روانه اونۍ وویل،چې د طالبانو له واکمنيدو سره د افغانستان شاوخوا نیمايي رسنۍ سقوط شوي او تر ۶۰ سلنې زيات خبریالان وزګار شوي او بد وضعیت کې ژوند کوي.