تاند( شنبه ، د اسد ۲۲ مه) د افغانستان لپاره د ايران د ولسمشر ځانګړي استازي حسن کاظمي قمي په ی يو لړ ټویټونو کې کابل ته د خپل سفر خبر ورکړی.
نوموړي دغه سفر نېټه نه ده په ډاګه کړې،خو ويلي چې د طالبانو د رییس الوزرا له اقتصادي مرستيال ملا عبدالغني برادر او د دوی د بهرنيو چارو وزير مولوي امیرخان متقي سره د داعش او «اشرارو» خلاف د ګډې مبارزې او نورو مسايلو په اړه غږيدلی دی.
د ايران ځانګړي استازي دغه خبرې رغوونکې وبللې او ويې ويل،چې د اقتصادي او مثبتو تعاملاتو تر څنګ پکې د داعش او اشرارو خلاف په ګډه پوله کې د همکارۍ په زياتيدو ټينګار شوی دی.
د طالبانو د بهرنيو چارو وزارت په یوه اعلامیه کې د ملا متقي په حواله ویلي،چې په دې لیدنه کې چا ته د دواړو هېوادونو د اړیکو د خرابولو د اجازې په نه ورکولو ېې ټینګار کړی.
طالبانو او د ايران حکومت په دې اړه نور جزییات نه دي ورکړي،چې د داعش خلاف مبارزه کې به څه ډول همکارۍ سره کوي؟