تاند( سې شنبه ، د اسد ۱۸ مه) د طالبانو تر کنټرول لاندې د افغانستان د کار او ټولنيزو چارو وزارت چارواکي وايي،چې د څه باندې ۳۸ زره کاري جوازونو توزېع او د ۴۳ میلیونه افغانۍ عوایدو راټولول، په وروستي یوه کال کې د دوی عمده لاسته راوړنې دي
د دغه وزارت د طالب مسئولینو په خبره، د کاري جوازونو توزېع، د روزنتونونو رامنځته کول، په بېلابېلو برخو کې د لسو طرحو چمتو کول، د تفاهم لیکونو لاسلیکول، د حقوقي اسنادو بیاکتنه، یتیمو ماشومانو او بې بضاعته کورنیو ته د خدمتونو وړاندې کول او د فني او حرفوي زده کړو برنامو دایرول، په وروستي یوه کال کې د دغه وزارت له عمده لاسته راوړنو څخه دي.
د کار او ټولنیزو چارو وزارت لپاره د طالبانو د کار مرستیال، مولوي مخدوم عبدالسلام سعادت، په یوه خبري کنفرانس کې وویل: د طالبانو د پالېسۍ په رڼا کې د بېوزلۍ او بې کارۍ کمولو او ښو خدمتونو وړاندې کولو په منظور، وروستي یوه کال کې ۳۷۳۲۳ کاري جوازونه کورنیو اتباعو او ۱۲۹۷ کاري جوازونه بهرنیو اتباعو ته توزېع شوي او دغه وزارت له بېلابېلو منابعو نه ۴۳ میلیونه او ۴۰۱ زره او ۷۹۰ افغانۍ عواید راټول کړي دي.
ښاغلي سعادت زیاته کړه: طالبانو په وروستي یوه کال کې ګڼې ملي او زېربنایي پروژې لکه د قوش تېپې کانال، د سرپل د نفتو او ګازو او د نوي کابل پروژوې افتتاح کړي، چې له دې لارې شاوخوا ۷۰ نه تر ۸۰ زره کسانو ته مساعد کاري فرصتونه برابرېږي.
د دغه طالب مقام په خبره، په بېلابېلو برخو کې د لسو طرحو جوړول لکه د سوالګرو د ستونزو حلولو طرحه، د کاري جواز د ورکړې څرنګوالي طرحه، د روږدو کسانو د درملنې طرحه، د فني او حرفوي زده کړو ورکولو طرحه، له سختو کارونو نه د ماشومانو د مخنیوي طرحه، د همکاریو راجلبولو طرحه او د ظرفیت لوړونې طرحه، په وروستي یوه کال کې د دغه وزارت له نورو لاسته راوړنو څخه دي.
د راپور له مخې په وروستي یوه کال کې د کار او ټولنیزو چارو وزارت په ټولیز ډول په مرکز او ولایتونو کې د ۴۰ زره او ۴۰۲ ماشومانو او بې بضاعته کورنیو لپاره د مرستو زمینه برابره کړې او دغه راز په مرکز او ولایتونو کې یې له خطر سره د مخ ماشومانو ۸۴۷۲ قضیې څېړلي دي.
د ښاغلي سعادت، د وروستي یوه کال پر مهال په مختلفو برخو کې ۸۵۹۷ تنو ته د حرفوي او فني زده کړو زمینه برابره شوې، د ۴۷۸ وړکتونونو له لارې په هېواد کې ۳۵۰۰ ماشومانو ته د ښوونې او روزنې زمینه برابره شوې او دغه راز ۷۵۰۰ یتیمو او بې سرپرسته ماشومانو ته اړین خدمات وړاندې شوي دي.
د معلوماتو له مخې دغه وزارت د ۱۵ روزنتونونو کار پیل کړی چې له دې جملې په لوګر ولایت کې د یوه روزنتون ودانیزې چارې بشپړې او په نورستان، ډایکنډی، جوزجان او تخار ولایتونو کې د ۴ نورو روزنتونونو ودانیزې چارې به هم ډېر ژر بشپړې شي.
د کلني راپور معلوماتو پر بنسټ، د کړنو ښه والي، همکاریو جلبولو او کاري پروسو ساده کولو په موخه، د کار او ټولنیزو چارو وزارت د اداري اصلاحاتو او ملکي خدمتونو ادارې، مرسي کورپس، نوف انلیس، هاجر او د عدالت څار موسسو سره تفاهم لیکونه لاسلیک کړي او د ۳۷ حقوقي سندونو بیاکتنه یې هم تر سره کړې ده.
د راپور پر اساس، ۵۵۰۰ تنو ته د فني زده کړو ورکړه، د څه باندې ۶۰ زره کاري جوازونو صادرول، د حقوقي اسنادو تعدیل او بیاکتنه، د عامه پوهاوي برنامو په لار اچول، خدمتونو ته د یتیمو او بې سرپرسته ماشومانو او بې بضاعته کورنیو د لاسرسي زمینه برابرول، د بشردوستانه مرستو اسانتیا او د روزنتونونو د جوړولو چارو څارل، په روان کال کې د دغه وزارت له عمده برنامو څخه دي.