تاند(پنجشنبه، د اسد ۶مه) د ازبکستان د ترانسپورت مرستیال وزیر چوریف جاسو وايي، د ترمذ – مزارشریف رېللار به په پنځو کلونو کې د کابل له لارې له پېښور سره وصل شي.
د ازبکستان د بهرنیو چارو وزارت له لوري په یوه خبرپاڼه کې د جاسو له قوله ویل شوي چې د دې پروژې، چې ترانس افغان رېللار نومول کېږي، سروې به د راروان اګست په لومړیو کې پیل او د سپټمبر تر لومړیو بشپړه شي.
په تېرو کلونو کې د ازبکستان د ترمذ له سرحدي ښاره د افغانستان تر مزارشریف ښاره پورې رېللار جوړه شوې چې ۷۵ کیلومتره اوږدوالی لري. په پام کې وه چې دا رېللار د افغانستان له طریقه له ترکمنستان، تاجکستان او ایران سره وصل شي.
د ازبکستان د ترانسپورت د مرستیال وزیر په وینا، د سروې له بشپړېدو وروسته به د پروژې د عملي کېدو امکان وڅېړل شي او بیا به د داوطلبۍ له لارې جوړوونکې کمپنۍ ته وسپارل شي.
اټکل کېږي چې دا رېللار ۷۶۰ کیلومتره وي او د هغې لپاره به ۳۳ پُلونو او ۳ تمځایونو ته اړتیا وي.
د دې پروژې لګښت ۴ میلیارده او ۸۰۰ میلیون ډالره اټکل شوی دی.
د ترانس افغان رېللارې پروژه لومړی پلا په ۲۰۱۸ م کال ازبکستان وړاندیز کړه او د افغانستان حکومت یې هرکلی وکړ.
د افغانستان او ازبکستان د حکومتونو د مخکینۍ موافقې پر اساس ترانس افغان رېللار له مزارشریف ښاره، سمنګان، بغلان، پروان، کابل، جلال اباد او له هغه ځایه تورخم ته غځول کېږي
د دې لارې د جوړېدو په صورت کې به ازبکستان د افغانستان له لارې د پاکستان د کراچۍ او ګوادر بندرونو ته خپل محصولات وړلی شی.