تاند( پنجشنبه ، د اسد ۶ مه) د طالبانو د دفاع وزارت هغه راپورونه رد کړل، چې ګواکې د بدخشان ولايت د واخان سرحدي سیمه یې پاکستان ته سپارلې ده.
دغه وزارت په یوه اعلامیه کې ویلي، چې د دوی پوځي چارواکو له یادې سیمې لیدنه کړې او هلته مېشت طالب سرتېري یې د هېواد له سرحدونو او ارضي تمامیت څخه د ښه دفاع له کبله ستایلي دي.
په وروستیو ورځو کې د افغانستان د ستراتيژیکې څنډې او د پامیر پر لمن پروت ملي پارک ته څېرمه له واخان څخه د افغانستان د زمکنۍ بشپړتیا د پاکستان له خوا منځنۍ اسیا ته د یوه کوریډور د جوړولو د استخباراتي هڅو راپورونه ورکړل شوي او توندو غبرګونونو سره مخ شوي دي.
د طالبانو د کانونو او پټرولیم وزیر مولوي شهاب الدين دلاور په یوه مرکه کې ټينګار وکړ، چې د افغانستان يوه انچ خاوره به هم دوی چا ته ورنه کړي.
له دې سره په ټولنیزو رسنیو کې د طالبانو له لوري یوه خپره شوې ویډیو څرګندوي، چې د طالبانو جنګياليو په بدخشان ولايت کې د ياد شوي کوریډور لپاره د پاکستان له لوري لګول شوې نښې او جوړ شوی څلی له منځه وړی دی.
ويل شوي، چې د طالبانو جنګياليو دا کار د دوی د دفاع وزیر ملا یعقوب مجاهد په امر کړی.
د واخان د دغې موضوع په اړه د طالبانو ضد و نقيضو څرګندونو پاکستان سره په دې اړه د پټو معاملو په اړه د خلکو پوښتنې او شکونه زيات کړي دي.