تاند(پنجشنبه، د اسد ۶ مه) د طالبانو د حکومت د بهرنیو چارو سرپرست وزیر امیرخان متقي چې د افغانستان په اړه د تاشکند په کنفرانس کې د ګډون لپاره ازبکستان ته تللی، نن د پاکستان له باندنیو چارو وزیر بلاول بوټو زرداري سره وکتل.
د طالبانو د حکومت د بهرنیو چارو وزارت وايي، په دې کتنه کې دواړو خواوو د دوو هیوادونو ترمنځ پر سیاسي، اقتصادي او بشری همکاریو خبرې وکړې.
ښاغلي متقي له خپل پاکستاني ساري څخه وغوښتل چې د افغانستان او پاکستان ترمنځ د خلکو د تګ راتګ او تجارت په برخه کې اسانتیاوې برابرې کړي.
متقي وویل، د اسانتیاوو د برابرېدو له کبله به هغه میلیونونه افغانان، چې لا هم په پاکستان کې کډوال دي، خپل هیواد ته د تګ راتګ امکان ومومي.
پاکستان هغه افغانان، چې پاسپورت نه لري، اجازه نه ورکوي چې خپل هیواد ته ستانه شي خو د اختر په شپو ورځو کې یې په موقتي ډول اجازه ورکړې وه چې د تذکرو په ښوولو هیواد ته ستانه شي.
د طالبانو د بهرنیو چارو وزارت د اعلامیې پر اساس، د پاکستان د بهرنیو چارو وزیر بلاول زرداري بوټو مولوي متقي ته وویل، «نړۍ پر تاسو نیوکې کوي، خو ستاسي د لاسته راوړنو هم باید قدر وشي.»
د طالبانو پر حکومت د نړیوالو او ډیرو افغانانو له لوري انتقاد کېږي چې نجونې یې له تعلیمه بې برخې کړي، ښځو ته د کار اجازه نه ورکوي، د بیان ازادي یې محدوده کړې او بشري حقونه نه رعایتوي.