خبریال: جبارخېل(سې شنبه، د سرطان ۲۸ مه) په کابل کې لسګونه جوړې، چې اقتصادي شرایطو د واده چانس ورڅخه اخیستی و، په ډله واده وکړ. له دغو جوړو څخه ځینو ویلي چې د واده په مراسمو کې یې پیسې نه دي لګولي.
دوی دغه راز د اقتصادي ستونزو او د ودونو د پرله پسې لګښتونو له امله د ځوانانو له ودونو څخه د پاتې کېدو په اړه هم اندېښنه څرګنده کړه.
د دغو جوړو کورنیو ویلي چې زامن او لوڼې یې له کلونو راهیسې د ناسمو دودونو له امله د واده د مراسمو لګښت نه شو پوره کولای.
د واده تنظیموونکي وايي، له دې کړنې یې موخه د اسانه ودونو د دود رامنځته کول او د ودونو په مراسمو کې د زیاتو لګښتونو مخنیوی دی.
ګران بيه ودونه اوس يو ټولنيز دود ګرځېدلی دی. په دې مراسمو کې ګډونوالو له کورنیو وغوښتل چې د هېواد اقتصادي وضعیت ته په پام سره د ودونو د لګښتونو د کمولو لپاره هڅې وکړې.