تاند( چار شنبه ، د سرطان ۲۲ ) د پکتیا په ځاځي اریوب ولسوالۍ کې د زون په کچه د والیبال سیالۍ پیل شوې.
ځایي طالب چارواکو ويلي، چې یادې سیالۍ د پکتیا، پکتیکا، لوګر اوخوست ولایتونو د ۲۶ لوبډلو ترمنځ پیل شوې چې درې ورځې به دوام وکړي.
یاده ولسوالۍ ډیورنډ فرضي کرښې ته څېرمه پرته ده چې د اختر په شپو او ورځو کې زرګونه سېلانیان مېلو ته ورغلي دي.
دغه ولسوالي ښايسته طبیعي منظرې او هوا لري، چې مخکې کلونو کې د طالبانو له لوري نا امنه شوې وې او څوک ډاډه ورتلای نه شول.
په وروستيو کې ډېرو خلکو د یادې ولسوالۍ د اختریزو مېلو عکسونه خپاره کړي او په دې ولسوالۍ کې د سياحتي اسانتياوو د زياتولو غوښتنه کړې ده.