تاند( سې شنبه ، د سرطان څوارلسمه ) ځینې خبري رسنۍ د خپلو سرچينو په حواله وايي ، چې د طالبانو د استخباراتو رياست د باميان ولايت د معارف د څارنې يو مقام له يوې نجلۍ سره ، چې ده نه يې د معلمې په توګه د مقررۍ غوښتنه لرله،د زنا پر وخت نيول شوی دی.
د سلام وطندار راډيو په يوه راپور کې د نیول شوي کس نوم بشر حيدري ښودل شوی.
دا رسنۍ د خپلو سرچينو په اساس، یاد شوی مقام د باميان د معارف رياست لپاره د طالبانو د رييس مولوي اسلامالدین عثماني له نيږدې کسانو څخه ګڼي.
د معلوماتو په اساس،دغه تورن کس اوړمه شپه د باميان د مرکز اړوند د «بامسرای» له يوه روغتيايي مرکز څخه د زنا پر نيول شوی دی.
ويل شوي ، چې تورن کس زنا کوونکې نجلۍ په دې هیله زنا ته راضي کړې وه ،چې د معلمۍ يو بست به ورکوي.
اوس ویل کیږي ،چې د طالبانو د معارف سيمه ييز رييس د دغه تورن کس د خوشې کولو هڅې کوي.
د باميان لپاره د طالبانو د والي وياند عبدالصبور فرزان سیغاني وويل چې بشر حیدري د دوی استخباراتو نیولی،خو د ور پورې شوي تور په اړه یې څه معلومات نه لري.
د يادونې وړ ده ،چې تر دې مخکې هم يو شمېر طالب منسوبین په ورته ځینو تورونو نیول شوي،خو د غیر طالبو تورنو کسانو برعکس نه ېې مخونه ور تور شوي او نه په درو وهل شوي دي.