تاند( سې شنبه ، د سرطان څوارلسمه ) د زابل په سیوري ولسوالۍ کې تېره شپه ۵۰ ماشومان کولرا ته ورته ناروغۍ باندې اخته شوي دي.
د یاد ولایت لپاره د طالبانو د عامې روغتیا رییس وايي، چې سیمې ته یې د روغتیا پالانو یو ټیم لېږلی چې د ناروغانو درملنه پيل کړي.
د دغې ناروغۍ د عواملو او په دې اړه چې هلته ځایي روغتيايي اداره يې د درملنې امکانات لري کنه،څه نه دي ويل شوي.
د افغانستان د نظام له نسکوریدو او د طالبانو له واکمنيدو سره له دې کبله،چې په زوره د واک ته رسېدو په خاطر نړیوالو د طالبانو واکمني په رسميت نه ده پېژندلې،ډېرو نړیوالو ادارو د افغانستان له روغتيايي سيستم سره خپلې مرستې کمې کړي يا یو مخ ودرولي دي.
د دې ترڅنګ د فقر او اقتصادي ناورين شدت هم يوه جدي ستونزه ده،چې له کبله ېې په خوارځواکۍ او ډېرو نورو ناروغیو د میلیونونه افغانانو ،په خاص ډول د ماشومانو د اخته کیدو خبرداری ورکړل شوی دی.