تاند( دوشنبه ، د سرطان شپږمه ) د سرپل ولايت له بلخاب ولسوالۍ څخه ، چېرته چې طالبانو د خپل ياغي شوي هزاره قومندان مولوي مهدي خلاف له څو ورځو راهيسې پوځي عمليات پيل کړي وو ، د وضعیت په اړه بېلابېل راپورونه ورکړل شوي.
د راپورونو په اساس ، د طالبانو ځواکونو له څلور ورځینیو نښتو وروسته د بلخاب ولسوالۍ مرکز او ځینې سيمې نیولي او مولوي مهدي او کسان ېې په تېښته بريالي شوي دي.
له دې سره د افغانستان د شیعه علماوو شورا ، چې ویل کیږي ایران سره نیږدې اړیکې لري او د همدغه هېواد په اشاره د بلخاب د ناراميو د حل لپاره هڅې کوي ، د طالبانو د رییس الوزرا له اداري مرستيال مولوي عبدالسلام حنفي سره لیدلي.
شیعه علماوو په دې لیدنه کې له بلخاب څخه د ملکي وګړو د مرګ ژوبلې او بې کوره کیدو شکايت کړی ، خو ملا حنفي ویلي چې دوی د خلکو پر وړاندې څه نه دي کړي او نه ېې کوي.
نوموړي دغه راز یاغي شوي هزاره طالب قومندان ملا مهدي ته په اشارې سره ټينګار کړی ، چې د طالبانو حکومت هېچا ته د فتنې جوړولو اجازه نه ورکوي.
د بلخاب جګړه له څو ورځو راهيسې له طالبانو څخه د دوی د ناراض شوي هزاره قومندان مولوي مهدي او طالبانو ترمنځ پيل شوې ده ، چې دواړو لوريو ته د مرګ ژوبلې مختلفې ادعاوې پکې شوي دي.
مولوي مهدي د طالبانو د بیرته واکمنيدو په لومړیو څو مياشتو کې د بامیان ولایت لپاره د طالبانو د استخباراتو رییس و ، چې له دندې تر ګوښه کیدو وروسته خپلې پلرنۍ سیمې بلخاب ته لاړ او د ولسوالۍ له نیولو سره ېې له طالبانو څخه بغاوت وکړ.
طالبانو د نوموړي د پخلاينې لپاره څو پلاوي واستول او د ښار جوړونې وزارت د مرستیالۍ لپاره ېې کابل ته وباله ، خو مولوي مهدي ونه منله.
د مولوي مهدي پر وړاندې د طالبانو د عملياتو له پيل سره د ايران په اطاعت د افغانستان د شیعه علماوو تورنې شورا له طالبانو وغوښتل ، چې مولوي مهدي سره د روغې جوړې واک او فرصت ورکړي ، چې د شورا د اعلاميې له مخې دغه فرصت ورنه کړل شو.
د یادو عملیاتو له پیل سره ، د دې باوجود چې مولوي مهدي د طالبانو بیرغ ودرولی و او ځان یې طالب باله ، خو د هزاره ګانو قوم ډېرو مشهورو سیاسي، مطبوعاتي او نورو څېرو له نوموړي ملاتړ وښود او د طالبانو عملياتو ته ېې د « هزاره وژنې » نوم ورکړ.
دا په داسې حال کې ده ، چې دغو هزاره مدافعینو تر دې مخکې طالبان یو مخ پښتانه او د پښتنو مدافعین بلل ، خو اوس ترې غواړي چې هزاره طالبانو ته په خپل حکومت کې پراخه ونډه ورکړي.