تاند( دوشنبه ، د سرطان شپږمه ) ایراني چارواکو په دغه هېواد کې د مېشتو افغان کډوالو د شمېر په اړه تازه ارقام خپاره کړي دي.
د ایران د کورنیو چارو وزارت امنيتي مرستيال سيد مجيد میر احمدي ويلي، چې په ایران کې د مېشتو افغان کډوالو شمېر ۴ ميليونه او ۵ سوه زره تنه اټکل شوی دی.
نوموړي زیاته کړه، چې د افغان کډوالو د تازه ثبت پر مهال څرګنده شوه ، چې له دغه شمېر کډوالو څخه ۲ میلیونه او ۳۰۰ زره کسان ېې په ناقانونه توګه په ایران کې ژوند کوي.
ایراني مقام د افغان کډوالو د بیا سرشمېرنې دليل هلته د افغان کډوالو د کره شمېر معلومول ښودلې، خو ځینې شنونکي باور لري چې د دې کار تر شا د ایران نور هدفونه شته دي.
له هغې ډلې یو هدف دا دی، چې ایران د کډوالو د ویستو لپاره دلایل زیاتوي او په دې ډول نړیواله ټولنه غواړي د مرستو د لاسته راوړلو لپاره تر فشار لاندې راولي.
د طالبانو د حکومت د کډوالو وزارت شاوخوا ۱۰ ورځې مخکې د پناه غوښتونکو د نړيوالې ورځې په مناسبت په ایران کې د افغان کډوالو شمېر شاوخوا ۳ نیم میلیونه تنه ښودلی و.
د بښنې نړېوال سازمان بیا د ایران په ګډون د افغانستان ځینې ګاونډي او نور هېوادونه د افغان کډوالو او پناه غوښتونکو پر وړاندې په بد چلند تورن کړي وو.