تاند( یکشنبه ، د سرطان پینځمه ) په داسې حال کې ، چې طالبانو د کابل له نیولو وروسته د خپلو ټولو مخالفانو پر وړاندې د « عمومي عفوې » اعلان کړی و ، خو د تاند سرچېنې څرګندوي چې په سويل ختيز کې د تندر قول اردو پخوانی قومندان جنرال شعور ګل له څو مياشتو راهيسې حقاني شبکې بندي کړی او په بې سرنوشتۍ کې ژوند تیروي.
د افغانستان د ړنګ شوي ملي پوځ یوې سرچینې وویل ، چې جنرال شعور ګل دندې ته ژمن قومندان و، د حقاني شبکې جنګياليو سره ېې ډېرې جګړې شوې وې ، ځکه خو دغې شبکې له څو مياشتو راهيسې بندي کړی او نه ېې خوشې کوي.
طالبانو د جنرال شعور ګل د نیولو په اړه څه نه دي ويلي ، خو د جمهوري نظام د ملي دفاع وزارت پخوانی ویاند جنرال دولت وزیري ، چې د طالبانو د اړیکو کمیسیون په بلنه بیرته هېواد ته ستون شوی ، وايي د دغه جنرال د خوشې کیدو په اړه ېې له یو شمېر طالب چارواکو سره خبرې کړي دي.
د هغه په وينا ، په دې اړه ېې د طالبانو د بهرنيو چارو وزير مولوي امیرخان متقي او د معادن او پټرولیم وزیر مولوي شهاب الدين دلاور سره لیدلي او هغوی په دې اړه څه همکارۍ ډاډ ورکړی دی.
دا په داسې حال کې ده ، چې طالبان له بهر ته تللو پخوانيو افغان چارواکو او په خاص ډول له تازه روزل شویو نظامیانو څخه د هېواد ته ستنیدو غوښتنه کوي.
ويل کيږي ، چې د طالبانو زندانونه په سلګونه نورو پخوانيو نظامي او ملکي چارواکو ډک دي ، خو د رسنيو د سانسور او طالبانو د ګواښونو له امله د بندیانو خپلوان او ملګري په دې اړه افشا ګري نه شي کولای.
د طالبانو د بهرنيو چارو وزير ډېر ځله د بهرنيو سفرونو پر مهال ادعا کوي ، چې د دوی په زندانونو کې یو سیاسي بندي هم موجود نه دی.
دا به يې ختمي د څېړنو يا پښتنو او ګروېږنو لپاره آی ايس آی ته په لاس ورکړی وي چې تحقيقات ترې وکړي.