تاند (پنجشنبه، د تلې/ میزان ۹ مه) طبي څېړونکو د دوهم ډول شکر ناروغۍ د تشخیص لپاره یوه نوې او اسانه لاره موندلې چې له مخې یې ښايي په راتلونکې کې د وینې له اخیستو پرته، یوازې د ناروغ د ږغ له اورېدو څخه د ناروغۍ نښې معلومې شي.
د څېړونکو په وینا، شکر یا قند د انسان د غږ په فریکونسۍ، جذابیت او د غږ په تارونو کې ډېر کوچني بدلونونه رامنځته کوي. دغه بدلونونه د انسان غوږ په عادي ډول نه شي درک کولی، خو د مصنوعي ځیرکتیا سیستم یې پېژندلی شي.
په دې ازموینه کې ناروغ کولی شي په خپل ځیرک ملفون کې یوازې له شپږو تر لسو ثانیو پورې یوه جمله ووایي. وروسته د مصنوعي ځیرکتیا ماډل د ږغ نمونه تحلیلوي او اټکل کوي چې ایا دغه کس د دوهم ډول شکر ناروغي لري که نه. د راپور له مخې، د دې ازموینې دقت کابو ۸۹ سلنې ته رسېږي.
د دې ټکنالوژۍ په مرسته ښايي د شکر ناروغۍ د تشخیص وخت او لګښت کم شي او خلک وکولی شي په کور کې، پرته له درد څخه، لومړنۍ ارزونه وکړي.
په ټوله نړۍ کې ډېر کسان له دې ناروغۍ څخه ناخبره دي. څېړونکي تمه لري چې د غږ پر بنسټ دغه ډول ازموینې به په لومړیو پړاوونو کې د شکر ناروغۍ د احتمالي ناروغانو په پېژندلو کې مرسته وکړي.
————————————————–
یادونه: دا او په تاند کې ټول نور روغتیايي مطالب د معلوماتو او د روغتیا په اړه د عامه پوهاوي د زیاتولو لپاره دي. د ناروغۍ د تشخیص او درملنې لپاره باید له ډاکټر سره مشوره وشي.