تاند(شنبه، د سرطان ۳ مه) د ایسلنډر د سروې له مخې، د امریکا د میزوري ایالت مرکز کنساس سیټي د سفر او ژوند لپاره د نړۍ تر ټولو ښه ښار دی.
کنساس سیټي د باربکیو (کباب)، د جاز موزیک د نندارو او ډېرو فوارو د لرلو له کبله مشهور دی.
د نیلسن – اتکینس د هنرونو موزیم، کاوفمن لوبغالی د نورو جالبو ځایونو ترڅنګ د ښار مرکزي برخه د دې ښار په زړه پورې جاذبې دي.
آیسلنډر د نړۍ په ۱۵۰ ښارونو کې، چې سروې کړي یې دي، د ژوند او سفر لپاره د اتریش پلازمېنه ویانا دوهم، د نیوزیلنډ پلازمېنه ولینګټن درېیم، د ډنمارک پلازمېنه کوپن هېګن څلورم او د بریتانیا اډنبرا ښار پنځم ښه ښارونه بللي دي.
د دې سروې له مخې، د کاناډا ویکتوریا، د استرالیا پیرت، د جرمني فرانکفورت، د استرالیا بریس بېن او د فنلنډ هیلسنکي له ۶ تر لسم پورې ښه ښارونه ګڼل شوي دي.
حیرانوونکې دا ده چې د دې سروې د لیست په سر کې د نیویارک، لاس انجلس، لندن او پاریس په شان ستر ښارونه چې ډېر سیلانیان هم لري، نه دي شامل.
له بلې خوا اکانومیست مجلې هم ښارونه د ژوند له نظره درجه بندي کړي او په دې اړه په خپل لیست کې یې د اتریش پلازمېنه ویانا د نړۍ تر ټولو ښه او د سوریې پلازمېنه دمشق تر ټولو بد ښار بللی دی. د اکانومیست په لیست کې د ښه والي له پلوه د ډنمارک پلازمېنه کوپین هېګن دوهم، د سویس زوریح ښار درېیم او د کاناډا کلګري ښار څلورم ګڼل شوي دي.
خو په بدو ښارونو کې له دمشق وروسته د پاکستان کراچۍ، د لیبیا طرابلیس، د نایجریا لاګوس او د الجزایر پلازمېنه الجزیره د لیست په پای کې دي.
اکانومیست ویلي چې دا درجه بندي یې د ښارونو د چاپیریال (هوا)، ښاري تاسیساتو، ښوونې او روزنې، روغتیا او طبي خدماتو پر اساس کړې ده.