تاند( جمعه ، د سرطان درېیمه) د افغانستان د برېښنا شرکت دوه انجنیران د هلمند – کندهار پر لويه لاره د ترافيکي پېښې له امله وژل شوي دي.
ياد شوي شرکت په يوه اعلاميه کې ويلي ، چې یو تخنیکي ټیم يې له یوه نیمې میاشتې راهیسې د کجکي برېښنا فابریکه کې په کار بوخت وو، چې پرون کابل ته د ستنیدو پر وخت ېې د هلمند – کندهار په لویه لاره ټرافیکي پېښه وکړه.
سرچينه زياتوي:« په دې پېښه کې د افغانستان برېښنا شرکت دوه تنه پیاوړې انجنیران، انجنیر راز الدین او انجنیر نوید فیضي په شهادت ورسیدل.»
په دغه پېښه کې د برېښنا شرکت دوه نور انجنیران( انجنیر خواجه عزیز صدیقي او انجنیر عبدالمتین بارکزی) او ددوی موټر چلوونکی هم ټپيان شوي دي.
د برېښنا شرکت طالب چارواکو د دغو انجنيرانو شهادت د افغانستان برېښنا شرکت کورنۍ او هېوادوالو لپاره یوه ستره او نه جیبرنېدونکې ضایعه ګڼلې ده.