تاند(پنجشنبه، د سرطان دويمه) د ملګروملتونو امنیت شورا د پنجشنبې په ورځ ( د افغانستان پ وخت د مازدیګر په ۶ نیمې بجې) په یوه ځانګړې غونډه کې د افغانستان وضعیت وارزاوه.
په دې غونډه کې په افغانستان کې د ملګروملتو د مرستندوی ماموریت سرپرست او مرستیال رامز الاکبراوف د افغانستان د وروستي وضعیت، په تېره بیا په پکتیکا او خوست کې د زلزلې د زیانونو او مرګ ژوبلو د پراخوالي، زلزله ځپلیو ته د مرستې رسونې، د مرګ ژوبلو د شمېر او نورو کړاوونو په اړه څرګندونې وکړې.
ده چې له کابل څخه د ویدیو کنفرانس له له لارې د امنیت شورا غونډې ته خپل راپور وړاندې کاوه، په افغانستان کې د بیان د ازادۍ او د ښځو د محدودیتونو په اړه هم خبرې وکړې.
دې غونډې ته د امریکا ساتازې وویل چې که طالبان غواړي له نړیوالو سره ښې اړیکې ولري باید د ښځو خلاف محدودیتونه پای ته ورسوي.
په افغانستان کې د ملګرو ملتونو د سرمنشي د ځانګړي سیاسي دفتر یوناما پر اساس په دې غونډه کې د افغانستان په اړه د ملګروملتونود سرمنشي د وروستي راپور په هکله هم خبرې وشوې.
تر غونډې مخکې یوناما ویلي و چې په دې غونډه کې به په بشري چارو کې افغانستان لپاره د ملګروملتونو د عمومي منشي مرستیال رامز الاکبروف د دغه هیواد د موجود وضعیت په باب د امنیت شورا غړو ته معلومات ورکړي.
ملګروملتونو په یو راپور کې ویلي، طالبان د روان ۲۰۲۲ میلادي کال د اپریل له میاشتې وروسته افغانستان کې خپل واک پیاوړی کړی او خپل ۴۱ غړي چې نومونه یې د ملګروملتونو د بندیزونو په لیست کې دي په کابینه او نورو لوړو څوکیو کې ګمارلي دي.
ملګروملتونو په دغه راپور کې ویلي، چې په لوړو څوکیو باندې ټاکل شوي دغه طالب چارواکي د کاري وړتیا پر ځای د ګوندي د اړیکو او وفادارۍ پر اساس ګمارل شوي دي.
همداشان په دغه راپور کې د القاعدې د ډلې د مشر له خوا د طالبانو مشر ته د بیعت د بیا نوي کولو یادونه هم شوې ده او ویل شوي چې د ملګروملتونو د غړو هیوادونو ارزونې ښيي چې القاعده په افغانستان کې د پټیدو خوندي ځایونه لري.
د ملګروملتونو د عمومي منشي په وروستي راپور کې افغانستان کې د داعش د ډلې فعالیت ته هم اشاره شوې او ویلي یې دي چې دغې ډلې یو ځل بیا په دغه هیواد کې خپل بریدونه زیات کړي دي.
خو د طالبانو حکومت په افغانستان د القاعدې د شتون او ازاد فعالیت په اړه راپورونه رد کړي او ویلي یې دي چې هیچا ته به د دې اجازه ورنکړي چې د افغانستان خاوره د کوم هیواد پرخلاف وکاروي.
همداشان د طالبانو حکومت په افغانستان کې د داعش د فعالیت په اړه اندیښنې هم بې ځایه بللې او ادعا یې کړې چې داعش په دغه هیواد کې فزیکي حضور نلري.
د ملګرو ملتونو دا غونډه په داسې حال کې جوړیږي، چې د افغانستان لپاره ددغې ټولنې د عمومي منشي د ځانګړې استازې د کار موده تیره اونۍ پای ته ورسېده.
ملګروملتونو عمومي منشي تر اوسه لا د افغانستان لپاره خپل ځانګړی آستازی نه دی ټاکلی خو په سیاسي چارو کې یې یو جرمني دیپلومات مارکوس پټسل د خپل مرستیال آستازي په توګه ټاکلی دی.
د معلوماتو له مخې مارکوس پټسل به د نوي ځانګړي استازي تر ټاکل کېدو د عمومي منشي د ځانګړي آستازي چارې هم پرمخ یوسي.
طالبانو د ملګرو ملتونو له لوري پر خپلو دوو تعليمي چارواکو د بهرنيو سفرونو د بندیز د دوام پریکړه « غیر منصفانه » وګڼله او خبرداری یې ورکړ ، چې د دوی په وينا « داسې بې ځايه فشارونه » به کومه پایله ونه لري.
ويل کيږي چې د طالبانو پر دغو مشرانو د بهرنيو سفرونو د بندیز دوام د نجونو زده کړو ته د هغوی د مزاحمت له کبله شوی دی.