تاند(پنجشنبه، د سرطان ۲ مه) د هند د بهرنیو چارو وزارت د يوې مطبوعاتي اعلاميې په خپرولو سره ویلي، چې د هند يوه تخنیکي ډله کابل ته په رسېدو د دې هېواد سفارت کې ځاى پرځاى شوې ده.
د هند د بهرنیو چارو وزارت وايي، هند له افغانانو سره تاريخي او متمدنې اړيکې لري او د خپلو شريکانو سره په همغږۍ او نږدې څارنې په موخه اغېزمنې بشري مرستو رسولو او افغانانو سره د تعامل په خاطر د هند يوه تخنیکي ډله نن کابل ته رسېدلې او په سفارت کې ځاى پرځاى شوې ده.
سرچینه زیاتوي، څه موده مخکې افغانستان سره د بشري مرستو لپاره د دوى يوه بله ډله له طالبانو چارواکو سره هم ليدلي او په ليدنه کې امنیتي مسایل وارزول شول.
د هند د بهرنیو چارو وزارت په وینا، افغانانو سره د هند ملګرتیا او په ځانګړې توګه بشري مرستې په راتلونکي کې هم دوام کوي.
سرچینه دغه راز وايي، په افغانستان کې د وروستیو زلزله ځپلو سره د مرستې لپاره په بشري مرستو يوه بار الوتکه هم کابل ته رسېدلې ده.
ياده دې وي چې هند تېر کال د اګسټ په 15مه وروسته له هغې سفارت وتاړه چې محمد اشرف غني له افغانستانه ووت او افغان حکومت وپرځېد او طالبانو پر کابل ولکه ټينګه کړه.