تاند(جمعه، د سرطان ۳ مه) د افغانستان په وروستۍ مرګونې زلزله کې د شمالي وزیرستان شاوخوا ۲۰۰ کډوال هم مړه شوي دي.
په خوست کې ځايي سرچینې وايي چې د دغه ولایت په سپېره ولسوالي کې د شمالي وزیرستان د مداخېل قبیلې نژدې ۳۰ تنه مړه شوي دي.
همداراز د پکتیکا د برمل او ګیان ولسوالیو ترمنځ په ډنګر سیمه کې د شمالي وزیرستان ۱۷۰ کډوال مړه شوي دي.
په کراچۍ کې مېشت د پښتون ژغورنې غورځنګ د مرکزي کمېټۍ غړي نبي وزیر ویلي چې په ډنګر سیمه کې د دوی د کورنۍ د څلورو ورېرونو په ګډون ۳۵ کسان مړه شوي دي.
ده همداراز ویلي چې دې زلزلې د شمالي وزیرستان شاوخوا ۶۰۰ کډوال زیانمن کړي دي.
د طالبانو د حکومت چارواکو تراوسه پورې په دې اړه څه نه دي ویلي.
د ملګروملتو د اټکل پر اساس د افغانستان وروستۍ زلزلې شاوخوا ۲ زره کورونه نړولي دي. د دې ادارې پر اساس، د هرې افغانې کورنۍ د غړیو شمېر په متوسط ډول ۸ تنو ته رسېږي نو ګومان کوي چې د مرګ ژوبلو حقیقي شمېر ښايي خورا ډېر وي.
د ملګروملتو د بشري همږغۍ دفتر (اوچا) وايي، هڅې روانې دي چې په سیمه کې وبا خپره نه شي. اوچا ویلي چې سر له اوسه لا د نس ناستي او شدید نس ناستي د نیم میلیون پېښو راپور ورکړای شوی دی.
د ملګروملتو د بشري مرستو د همږغۍ دفتر ویلي چې له زلزلو وروسته د وبا د خپرېدو اندېښنه په ځانګړي ډول جدي وي.
په افغانستان کې د روغتیا نړیوال سازمان ویلي چې لس ټنه طبي مرسته د افغانستان زلزله ځپلیو سیمو ته استوي