تاند( چار شنبه ، د سرطان لومړۍ) د افغانستان پخواني ولسمشر اشرف غني په یوه پیغام کې د پکتیکا او خوست ولايتونو د تېرې شپې زلزلې په مرګ ژوبلې او زيانونو خواشيني وښوده.
نوموړي په دغه پیغام کې ویلي: «پر نړیوالو خیریه بنسټونو، سازمانونو او په هیواد کې دننه هیوادوالو غږ کوم چې له زلزله ځپلو کورنیو سره مرستې وکړي او په دې سختو شېبو کې زموږ د دیني فریضې او اجتماعي فرهنګ په توګه د یو بل په څنګ کې ودرېږي.»
نن د طالبانو رييس الوزرا ملا محمد حسن اخند د پکتیکا او خوست ولايتونو زلزله ځپلو ته د ۱۰۰ ميليونه افغانيو مرسته اعلان کړه.
نوموړي اړوندو ادارو ته د زلزله ځپلو لپاره د عاجلو مرستو د برابرولو امر کړی او ویلي ، چې د خوراکي توکيو ، البسې او روغتيايي توکيو د لېږد لپاره دې هوايي او ځمکنيو امکاناتو څخه ګټه واخيستل شي.
ملا حسن اخند زلزله ځپلو سیمو ته د يوه لوړپوړي پلاوي د ورتلو خبر هم ورکړی.
طالبانو ویلي ، چې د پکتیکا او خوست د تېرې شپې زلزلې لږ تر لږه ۹۲۰ تنه وژلي او ۶۱۰ نور ېې ټپيان کړي دي.
يو شمېر هېوادونو او له هغې ډلې پاکستان او ايران له زلزلې ځپلو سره د مرستې د چمتووالي خبر ورکړی.
ځینو افغان منتقدینو پر طالبانو له نیوکو سره ویلي ، چې د دوی د ناقانونه او دنیا سره د بې رابطې حکومت له کبله د افغانانو دومره پراخه مرګ ژوبله هم نړۍ ته بې ارزښته شوې ده.