تاند( سې شنبه ، د جوزا ۳۱ مه) د ملګرو ملتونو نړيوال سازمان د طالبانو ۱۳ مشرانو ته د بهرنيو سفرونو بندیز تر ۳ مياشتو نورو هم بښلی.
له دې سره ، د طالبانو دوو نورو مشرانو ( د لوړو زده کړو وزير مولوي عبدالباقي حقاني او د پوهنې وزارت مرستيال سعيد احمد شهید خېل) ته دغه معافیت نه دی تمدید شوی.
د یادو دوو طالب چارواکو پر سفرونو د معافیت د نه تمدید دلیل د نجونو د زده کړو پر وړاندې د دوی خنډ کیدل ښودل شوي.
په ورته وخت کې ويل شوي ، چې ملګرو ملتونو ملا عبدالغني برادر ، عبدالسلام حنفي ، امیر خان متقي ، شېر محمد عباس ستانکزي ، شهاب الدين دلاور ، خیرالله خیرخواه، عبدالحق وثیق، نورالله نوري، عبداللطیف منصور، ملا فاضل مظلوم، مولوي عبدالکبیر، دین محمد حنیف، او نورمحمد ثاقب ته د سفرونو بندیز درې مياشتې نور ور بښلی دی.
طالبانو تر اوسه په دې اړه غبرګون نه دی ښودلی.