تاند(سې شنبه ، د جوزا ۳۱ مه) په پکتيا کې د طالبانو د منصوري قول اردو اړوند د سرحدي ځواکونو پر مرکز د پاکستان د بې پیلوټه الوتکې د برید په اړه ضد او نقیضې ادعاوې شوي دي.
ځايي سرچينو ويلي ، چې دغه برید پرون دوشنبه له غرمې وروسته، د پکتيا ولايت په ډنډ پټان ولسوالۍ کې شوی.
د سرچينو د معلوماتو په اساس ، طالبانو د دغه برید پر مهال د پاکستان پر بې پیلوټه الوتکې هوايي ډزې کړي دي.
یادو سرچينو په دغه ادعا شوي برید کې د ممکنه مرګ ژوبلې او نورو زیانونو په اړه څه نه دي ويلي.
د پکتيا ولايت لپاره د طالبانو د اطلاعاتو او فرهنګ رييس خالق یار احمدزي بيا دا ادعاوې رد کړې او بې بنسټه ېې وګڼلې.
د پاکستان او طالبانو د سرحدي ځواکونو تر منځ څو ځله د نښتو راپورونه ورکړل شوي.
پاکستان څو میاشتې مخکې په خوست ولايت کې د افغانستان خاوره په خپلو پوځي چورلکو بمبار هم کړه ، چې لسګونه تنو ته پکې مرګ ژوبله واوښته.
طالب چارواکو تر اوسه هم د پاکستان د ياد شوي بمبار په اړه ډېر څه نه دي ويلي.