تاند- د چین په یوه پوهنتون کې ۷۵ متره لوړ برج جوړ شوی چې د مځکې په مدار کې له سپوږمکیو سره د اتصال له لارې له فضا څخه لمریزه انرژي اخلي.
د انټرسټینګ انجینیرینګ د راپور له مخې، د فضا لمریزه انرژي د نړۍ د انرژۍ د کموالي له پوره کولو سره ډېره مرسته کولی شي خو د ډېر لګښت او د ټاکل شوې مودې له کبله د دې ډول برېښناکوټ ټکنالوژي لا هم نهايي شوې نه ده.
خو د چین تازه اقدام د فضا د لمریزي انرژۍ د ترلاسه کولو لور ته یو ګام ګڼل کېږي.
د شیدیان (Xidian) پوهنتون څېړونکو په فضا کې د لمریزې انرژۍ د ټولولو لپاره د وسایلو په تجربه کولو پیل کړی دی.
دوی د جون په ۵ مه د فضا د لمریزې انرژۍ د فول لینک بشپړ سیستم لومړنی برېښناکوټ (full-link and full-system solar power plant) وازمایه او نتیجه یې بریالۍ وه.
د لمریزې انرژۍ دا برج له پولادو جوړ دی او ۷۵ متره لوړوالی لري.
دا برېښناکوټ د مځکې په مدار کې له ګرځېدونکو سپوږمکیو سره وصل کېږي، ۲۴ ساعته او د اوونۍ په ۷ اورځو کې انرژي راټولوي او بیا یې د لوړې فریکوینسۍ په مایکروویف څپو مځکې ته لېږي.