تاند( دوشنبه، د جوزا ۳۰ مه) د فاطمه پیمان په نوم يوه افغاني الاصله اسټراليايي مېرمنه نن د استرالیا د مشرانو جرګې د ټاکنو په پایله کې سناتوره ټاکل شوې ده.
هغه د کارګر ګوند غړې ده او د اسټراليا په لویدیځ کې يې دغه څوکۍ ګټلې ده.
د اسټراليا نوي صدراعظم آنتوني البانزي په يوه ټویټ کې مېرمن پیمان ته مبارکي ویلې ده.
مېرمن پیمان په ۲۰۰۳ کې، هغه مهال چې ۷ کلنه وه، له افغانستان څخه اسټراليا ته تللې، خو پلار يې چې څو کاله مخکې په سرطان ناروغۍ ومړ، د طالبانو د تېرې واکمنۍ پر مهال له افغانستان څخه اسټراليا ته تللی و.
د نوموړې مېرمنې په بریالیتوب ډېرو افغانانو په ټولنيزو رسنيو کې خوښي ښودلې.
د دوی تر څنګ په کابل کې د طالبانو حکومت هم د دې مېرمنې په بریالیتوب خوشاله ښکاري.
د طالبانو تر کنټرول لاندې د افغانستان رسمي دولتي خبري اژانس د يادې مېرمنې د بریالیتوب خبر د هغې د حجاب اغوستو له زاویې خپور کړی او ویلي، چې فاطمه پیمان په آسټراليا کې هم حجاب اغوندي.
يو شمېر کسانو له طالبانو پوښتلي، چې ولې په هېواد دننه ښځو ته د زده کړو، کار او ټاکنو ته د نوماندۍ اجازه نه ورکوي.
طالبانو په رسمي ډول د مېرمن پیمان د بریالیتوب په اړه څه نه دي ویلي.
د دوی له بيا واکمنيدو سره په افغانستان کې سلګونه زره نجونې له شپږم ټولګي څخه د پورته ټولګيو له زده کړو محرومې شوي او لسګونه زره نورو ته د دندو او فعاليتونو اجازه نه ورکول کېږي.