تاند( یکشنبه، د جوزا ۲۹ مه) د افغانستان د بریښنا شرکت لپاره د طالبانو ټاکل شويو چارواکو د ياد شوي شرکت کارکونکو ته په یوه ځانګړې ناسته کې امر وکړ، چې خپل صورت او سیرت پر « شريعت او نبوي سیرت» برابر کړي.
د بریښنا شرکت د خبرپاڼې له مخې، په دې ناسته کې د طالبانو د دعوت او ارشاد عمومي رییس شیخ محمد هاشم شهيد ورور د شرکت ښځينه کارکوونکو ته د« اسلامي حجاب» د مراعاتولو امر وکړ.
ويل شوي، چې په دې غونډه کې د افغانستان د بریښنا شرکت لپاره د طالبانو اجراييوي رييس ملا محمد عیسی ثاني او د شرکت مسوولینو او کارکوونکو برخه لرله.
د طالبانو له واکمنيدو سره د ښځو چارو وزارت د ځای ناستي په توګه د امر بالمعروف وزارت د تاسیس تر څنګ په ټولو دولتي ادارو او حتا خصوصي پوهنتونونو کې د امر بالمعروف ادارې نمايندګي فعاله شوې، چې په خصوصي پوهنتونونو کې د پوهنتونونو له لوري امکانات او بوديجه پرې تحميل شوې ده.
امر بالمعروف د دولتي کارکوونکو تر څنګ د عامو خلکو پر ژوند هم ډېر قيودات لګولي، چې خلک يې سخت قهرولي دي.